Կազմակերպության կարողությունների զարգացում անվտանգության ապահովման ոլորտում
Հայտարարության հրապարակման սկիզբը՝ սեպտեմբերի 6, 2022 թ․
Հայտերի ընդունման վերջնաժամկետը՝ հոկտեմբերի 23, 2022 թ․
Հայտարարող կազմակերպություն՝ «Փինք» իրավապաշտպան հասարակական կազմակերպություն
«Փինք» իրավապաշտպան հասարակական կազմակերպությունը փնտրում է տեղական կազմակերպություն կամ անհատ փորձագետներ՝ տրամադրելու վերապատրաստում և խորհրդատվական ծառայություններ Փինքին և գործընկեր այլ քաղաքացիական հասարակության կազմակերպություններին (ՔՀԿ)։ Վերապատրաստումը և խորհրդատվական ծառայությունները պետք է ուղղված լինեն կազմակերպության և անդամների ամբողջական անվտանգության ապահովման հարցերին։ Կարող են ներառել ֆիզիկական անվտանգությունը, ռիսկերի գնահատում ու արձագանքումը, թվային անվտանգությունը և վեբ կայքերի ապահով աշխատանքը, համակցված անվտանգությունը և բարօրության ապահովումը։
Վերապատրաստման և խորհրդատվական ծառայությունների տրամադրումը նախատեսվում է 2022թ․ նոյեմբերից 2023թ․ հունիս ամիսների ընթացքում: Ծառայության համար նախատեսվող բյուջեն կարող է առաջարկել դիմող կազմակերպությունը կամ փորձագետը՝ գնահատելով նշված ժամանակահատվածում անհրաժեշտ և հնարավոր գործողությունները։
Հայտերի հետ կապված ցանկացած հարց կարող եք ուղարկել տվյալ էլեկտրոնային հասցեին՝ [email protected], նամակի առարկան նշելով՝ «Խորհրդատվական ծառայություն․ հարց, կազմակերպության կամ փորձագետի անունը»։
Կազմակերպության մասին
«Փինք» իրավապաշտպան հասարակական կազմակերպությունը ԼԳԲՏ (լեսբի, գեյ, բիսեքսուալ, տրանս) համայնքահեն ու իրավապաշտպան կազմակերպություն է։ Իր գործունեությունն ուղղված է ԼԳԲՏ անձանց մարդու իրավունքների պաշտպանությանը հետևյալ երեք հիմնական ուղղություններով՝
- անմիջական աջակցության տրամադրում ԼԳԲՏ անձանց և նրանց հարազատներին,
- հասարակության վերաբերմունքի շարունակական ուսումնասիրությունների և գործողությունների իրականացում, որոնք կարող ենք բերել դիրքորոշումների որոշակի փոփոխությանը,
- ջատագովություն, որը իր մեջ ներառում է ԼԳԲՏԻ անձանց խնդիրների լուծման ջատագովություն, ՄԻԱՎ-ի նկատմամբ առավել վտանգի ենթարկվող բնակչության և ՄԻԱՎ-ով ապրող անձանց իրավունքների պաշտպանության ջատագովություն խտրականության և անհանդուրժողականության նվազեցմանն ուղղված գործողություններ, զեկույցների պատրաստում և տրամադրում տեղական ու միջազգային կազմակերպություններին և այլն։
Մարդու իրավունքների պաշտպանության բնագավառում Փինքը խրախուսում և խթանում է հավասարության, խոցելի խմբերի ընդունման գաղափարները՝ հաստատելով մշակութային զգայունության և բազմազանության նկատմամբ հարգանքի միջավայր։
Գործընկերների մասին
Փինքը համագործակցում է մի շարք քաղաքացիական հասարակության կազմակերպությունների (ՔՀԿ) հետ, որոնց գործունեության ոլորտը հատվում է կազմակերպության գաղափարների հետ։ Դրանք մարդու իրավունքների բնագավառում գործող և խոցելի խմբերին աջակցություն տրամադրող կազմակերպություններ են, որոնք զբաղվում են հետազոտությունների համակարգմամբ և իրականացմամբ, որոնք ուղղված են հանրային իրազեկվածության մակարդակի բարձրացմանը, իրավական պաշտպանվածության ընկալումների բարելավմանը, իրավապաշտպանների պաշտպանվածությանը, կանանց աջակցությանն ու պաշտպանությանը, ԶԼՄ-ներում մարդու իրավունքների լուսաբանմանը, բնապահպանական բարեփոխումներին և այլն։
Ծառայության նկարագրություն
Ծառայություն մատուցող կազմակերպությունից կամ փորձագետից ակնկալվում է հետևյալ գործողությունների իրականացումը․
- Խորհրդատվական հանդիպումների անցկացում կազմակերպությունների ներկայացուցիչների հետ
- Վերապատրաստման դասընթացների անցկացում
- Անհատական խորհրդատվությունների իրականացում
- Թվային աուդիտի խորության որոշում և խնդիրների կարգավորում
- Վերհանված կարիքներից բխող այլ գործողությունների իրականացում
- Կարիքների և վերապատրաստման գործողությունների ամփոփման հաշվետվության ներկայացում։
Ծառայությունը պետք է ներառի Փինքի և գործընկեր այլ կազմակերպությունների կարողությունների և հմտությունների զարգացում հետևյալ ոլորտներում՝
- Անվտանգություն, ռիսկերի գնահատում և կառավարում
- Թվային անվտանգություն
- Համակցված անվտանգություն և բարօրության պահպանում
Մշտադիտարկում և գնահատում
Փինքն ակնկալում է ընտրված կազմակերպությունից (կոնսորցիումից) ներկայացնել մատուցվող ծառայությունների մշտադիտարկման ու գնահատման մեխանիզմները, որոնք կներառեն արդյունքների գնահատման հստակ չափանիշները, իրականացվող գործողությունների ընթացիկ վերահսկման և արդյունքների գնահատման մեխանիզմները։
Գործունեության սկզբունքներ
Դիմող կազմակերպությունից կամ փորձագետից ակնկալվում է կիսել և իր կողմից իրականացվող գործողություններով ուղղորդվել Փինքի արժեքներով՝ բազմազանություն, հավասարություն, ապահովություն և առանցքային առաջնահերթություն սահմանել հանդուրժողականությունը և խտրականության բացառումը, հարգանքը մարդու իրավունքների և հիմնարար ազատությունների նկատմամբ:
Հաշվի առնելով ԼԳԲՏ մարդկանց և նրանց խնդիրների զգայունությունը՝ կազմակերպությունները և անհատ մասնագետները պետք է ցուցաբերեն իրենց պատրաստակամությունը աշխատել բացառելով խտրականության ցանկացած դրսևորում, և առաջնորդվել «Մի՛ վնասիր» քաղաքականությամբ (ինչը ենթադրում է կազմակերպության շահառուների և մասնակիցների անվտանգության և ապահովության երաշխավորումը)։
Խորհրդատվական կազմակերպության և մասնագետների որակավորումներ
Կազմակերպության դեպքում դիմորդները պարտավոր են ներկայացնել աշխատանքային գործընթացներում ընդգրկվող աշխատանքային թիմի հիմնական անձնակազմի ինքնակենսագրականները և որակավորումները։ Անհատ-փորձագետների դեպքում կարևոր է ներկայացնել ինքնակենսագրականը՝ ոլորտային փորձի նկարագրությամբ։
Խորհրդատվական կազմակերպությունը կամ փորձագետները պետք է համապատասխանեն հետևյալ չափանիշներին՝
- Պարտավոր է ունենալ ոլորտային խորհրդատվական ծառայությունների մատուցման առնվազն երկու տարվա փորձ։
- Կազմակերպությունը պետք է ունենա ՀՀ-ում ԼԳԲՏ անձանց կամ այլ խոցելի խմբերի իրավիճակի մասին պատկերացում և իրավիճակի բարելավման մեջ հետաքրքվածություն։
Հաշվետվություն
Ընտրված կազմակերպությունը կամ փորձագետը պատրաստելու և ներկայացնելու է իրականացվող աշխատանքների ամփոփիչ հաշվետվություն Գործողությունների ավարտից հետո 10 աշխատանքային օրվա ընթացքում։
Ամփոփիչ հաշվետվությունը պետք է պարունակի իրականացված գործողությունների համապարփակ ամփոփումը, մշտադիտարկման և գնահատման արդյունքները, ինչպես նաև որպես հավելված ֆինանսական հաշվետվությունը կազմակերպության դեպքում։
Դիմելու ընթացակարգը
Հետաքրքրված թեկնածուները կարող են հայտերն ուղարկել տվյալ էլեկտրոնային հասցեին՝ [email protected], նամակի առարկան նշելով՝ «Խորհրդատվական ծառայություն․ կազմակերպության կամ փորձագետի անունը»։ Հայտերը պետք է գրված լինեն հայերեն լեզվով օգտագործելով Arial Unicode, Cambria կամ Sylfaen տառատեսակները, գրել 10 կամ 11 տառաչափով, տողերի արանքում առնվազն 1.15 տարածքով, էջի կողքերից առնվազն 1սմ տարածք թողնել: Վերնագրեր գրել առնվազն 12-16 տառաչափով, մուգ տառերով, ենթավերնագրերի տառաչափը կարող է լինելը տեքստի տառաչափով կամ 1-3-ով մեծ, ինչպես նաև ընդգծված, թեք կամ մուգ:
Հայտերը իրենց մեջ պետք է պարունակեն՝
- Խորհրդատվական ծառայության բովանդակային նկարագրությունը, որը կներառի կարիքների դուրս բերում ու ընկալումը, մշտադիտարկման և գնահատման նկարագրությունը,
- Նախնական աշխատանքային պլանը՝ ժամանակացույցով,
- Վերապատրաստման դասընթացների նախնական բովանդակությունը,
- Կազմակերպության՝ նմանատիպ աշխատանքների այլ փորձառության համառոտ նկարագրություն, ներգրավված անձանց որակավորումները և ինքնակենսագրականները,
- Ֆինանսական առաջարկը, որը իր մեջ պարունակում է մասնագետների հոնորարները և բոլոր այն ծախսերը, որոնք առնչվում են սույն ծառայության տրամադրմանը։ Ոչ մի հավելյալ ծախս, որը սահմանված չէ Փինքի և ընտրված կազմակերպության կամ փորձագետի միջև կնքված պայմանագրով, չի տրամադրվելու նշված հանձնարարականը կատարելու համար։
- ՀՀ-ի օրենսդրությամբ հանձնարարականի կատարման օրինական իրավունքը ունենալու ապացույցը՝ կազմակերպության դեպքում։
Թեկնածուների ընտրությունը կկատարվի հետևյալ չափանիշների հիման վրա՝
- Առաջարկվող խորհրդատվական ծառայության՝ ներառյալ աշխատանքային գործողությունների, դասընթացների և խորհրդատվության բովանդակության, ինչպես նաև կարիքների և գործողությունների գնահատման համապատասխանությունը կազմակերպության պահանջներին (6 միավոր),
- Կազմակերպության կամ փորձագետի՝ նմանատիպ աշխատանքների այլ փորձառություն (2 միավոր),
- Աշխատանքային թիմի անդամների կամ փորձագետի որակավորումները (2 միավոր),
- Լավագույն ֆինանսական առաջարկը՝ հիմնված առաջարկվող ծառայությունների և գնի համապատասխանության վրա կդիտարկվի որպես առավելություն։
Փինքը ընտրությունը կատարելիս օգտագործելու է չափանիշների գնահատման 10 բալանոց սանդղակ, որը բաժանված է միավորների, որոնք տրվելու են այս կամ այն չափանիշին ըստ կարևորության։
Մրցույթի ընթացքում թեկնածուների անհամապատասխան լինելու դեպքում Փինքը իրեն իրավունք է վերապահում պայմանագիր չկնքել խորհրդատվական կազմակերպության կամ փորձագետի հետ։
