Ծիածան ֆորում
Սիրելի ԼԳԲՏ+ համայնք և ծնողներ, ակտիվիստներ և համախոհներ,
2025 թվականին մենք կազմակերպեցինք հոբելյանական 10-րդ Ծիածան ֆորումը, որն արդեն դարձել է հայկական ԼԳԲՏ+ շարժման խորհրդանիշներից մեկը։ Տարիների ընթացքում Ֆորումը եղել է հարթակ, որտեղ մենք կարողացել ենք հավաքվել, մտորել ընթացիկ հարցերի ու խնդիրների շուրջ։ Կիսվել ենք մեր մտահոգություններով ու ձեռքբերումներով, պարզապես շփվել ու ծանոթացել միմյանց ու մեր կատարած կարևոր աշխատանքների ու ներդրումների հետ։
Ներկայիս դժվար ժամանակներում, երբ աշխարհում ու երկրում տեղի են ունենում մտահոգիչ փոփոխություններ, կարևոր է ունենալ տարածք՝ անդրադառնալու շարժման գոյության, մեր հիասթափություններին ու հնարավորություններին, մեր ուժեղ ու թույլ կողմերին։
Ծիածան ֆորումը ամենամյա կարևոր իրադարձություն է Հայաստանում և ամենամեծ քվիր-ակտիվիստական միջոցառումն է, որը միավորում է ԼԳԲՏ+ համայնքին ու համախոհներին, ակտիվիստներին ու իրավապաշտպաններին, մասնագետներին և ծնողներին։
Ծիածան ֆորումը ստեղծում է ապահով և ընդունող միջավայր, որտեղ կարող եք ծանոթանալ տարբեր մարդկանց, փոխանակվել գիտելիքներով և գտնել նոր ընկերներ ու համախոհներ։ Ֆորումը ներառում է քննարկումներ, աշխատարաններ և ներկայացումներ, որոնք վերաբերում են մարդու իրավունքներին, հոգեկան առողջությանը, ակտիվիզմին, ինչպես նաև սոցիալական և մշակութային և այլ թեմաներին։
Սա հարթակ է, որտեղ մասնակիցները կարող են բարձրաձայնել իրենց համար կարևոր հարցերի մասին, լսելի դառնալ և մասնակցել Հայաստանում ԼԳԲՏ+ համայնքի համար նշանակալի փոփոխությունների քննարկմանը։ Ֆորումը հնարավորություն է տալիս լսել և սովորել փորձառու ակտիվիստներից, իրավապաշտպաններից ու համախոհներից, ովքեր արդեն իսկ նպաստել են հավասարության և արդարության առաջմղմանը։
Միացե՛ք մեզ՝ շարունակելու կառուցել ուժեղ, համերաշխ և հավասար հնարավորություններ ունեցող Հայաստան։
Ներկայացնել քննարկման թեմա
Կցանկանա՞ք առաջարկել քննարկման թեմա և հանդես գալ որպես խոսնակ։ Ապա խնդրում ենք նամակ ուղարկել [email protected] հասցեին, որտեղ կներառեք․
- թեմայի վերնագիրը
- վարողի անունը և կոնտակտային տվյալները
- ներկայացվող թեմայի նկարագրությունը
- թեմայի կարևորության վերաբերյալ հիմնավորում
- փորձն այդ ոլորտում (եթե ունեք այդ որոտում աշխատանքային փորձ, մասնագիտական առնչություն, կատարել է ուսումնասիրություն կամ վարել եք նմանատիպ այլ դասընթացներ ու քննարկումներ)
Ձեր ներկայացումը պետք է չգերազանցի 15 րոպեն, իսկ բովանդակությունը չներառի խտրականացնող, զրպարտող կամ արժանապատվությունը նվաստացնող որևէ խոսք։