Հունիսի 12-14-ը տեղի ունեցավ եռօրյա հանդիպում Հայաստան նոր եկած ԼԳԲՏ+ անձանց համար, որի նպատակն էր մասնակիցներին տրամադրել գործնական տեղեկատվություն, աջակցություն և անհրաժեշտ հմտություններ՝ Հայաստանում իրենց նոր կյանքը կազմակերպելու և տարբեր համակարգերում ավելի վստահ կողմնորոշվելու համար։

Հանդիպմանը ներկա էր ԼԳԲՏ+ համայնքից 16 մասնակից՝ տարբեր երկրներից, այդ թվում՝ Իրանից, Հնդկաստանից, Նիգերիայից, Ալժիրից, Ռուսաստանից և այլ երկրներից։

Ծրագրի ընթացքում մասնակիցները հնարավորություն ունեցան ոչ միայն ստանալ օգտակար տեղեկություններ, այլև կիսվել սեփական փորձով, բարձրաձայնել իրենց մտահոգությունները և քննարկել Հայաստանում ապրելու ընթացքում հանդիպող դժվարությունների մասին։

Աշխատանքի և բնակարանի որոնում

Ծրագրի կարևոր թեմաներից էին աշխատանքի և բնակարանի որոնման գործընթացները։

Մասնակիցների հետ քննարկվեցին աշխատանքի որոնման տարբեր եղանակներ, Հայաստանում առավել հաճախ օգտագործվող կայքերն ու հարթակները, ինչպես նաև գործատուների հետ շփման առանձնահատկությունները։

Անդրադարձ կատարվեց նաև ինքնաներկայացման հմտություններին, աշխատանքի դիմելու գործընթացին և հարցազրույցների ընթացքում կարևոր նկատառումներին։

Քննարկվեց, թե ինչ տեղեկություններ է նպատակահարմար ներկայացնել գործատուին, ինչպես պատրաստվել հարցազրույցի և ինչպիսի դժվարությունների կարող են բախվել օտարերկրյա քաղաքացիները աշխատանք փնտրելիս։

Բնակարանի որոնման թեմայի շրջանակում մասնակիցները ծանոթացան բնակարանների որոնման հիմնական հարթակներին, վարձակալության ընթացքում տարածված խնդիրներին և այն քայլերին, որոնք կարող են օգնել խուսափել խաբեություններից կամ այլ ռիսկերից։

Իրավական կարգավորումներ և իրավունքներ

Հանդիպման ընթացքում մասնակիցներին ներկայացվեցին Հայաստանում օտարերկրյա քաղաքացիների աշխատանքի և կեցության հետ կապված իրավական կարգավորումները։

Քննարկվեցին օրինական աշխատանքի համար անհրաժեշտ փաստաթղթերը, աշխատանքի թույլտվության և բնակության կարգավիճակի հետ կապված հարցերը, ինչպես նաև տարբեր երկրների քաղաքացիների համար առկա հնարավոր խոչընդոտները։

Մասնակիցները հնարավորություն ունեցան ծանոթանալու նաև Հայաստանում գործող իրավական մեխանիզմներին և այն կառույցներին, որոնց կարող են դիմել իրենց իրավունքների պաշտպանության համար։

Առանձին քննարկում ծավալվեց խտրականության դեպքերի շուրջ, անդրադարձ կատարվեց տարբեր իրավիճակների և դրանց արձագանք տալու հնարավոր տարբերակներին։

Թվային և ֆիզիկական անվտանգություն

Ծրագրի մեկ այլ կարևոր հատված նվիրված էր թվային և ֆիզիկական անվտանգության հարցերին։

Մասնակիցները քննարկեցին անձնական տվյալների պաշտպանության, սոցիալական ցանցերից անվտանգ օգտվելու և առցանց հաղորդակցության ընթացքում հնարավոր ռիսկերի նվազեցման մեթոդները։

Հատուկ ուշադրություն դարձվեց նաև ծանոթության հավելվածների և կայքերի օգտագործման անվտանգության կանոններին։

Քննարկվեցին ինչպես առցանց, այնպես էլ իրական կյանքում հանդիպումների ընթացքում անվտանգության պահպանման կարևոր սկզբունքները, անձնական սահմանների պաշտպանությունը և հնարավոր վտանգավոր իրավիճակների կանխարգելման միջոցները։

Ֆիզիկական անվտանգության թեմայի շրջանակում մասնակիցները խոսեցին նաև հանրային տարածքներում անվտանգ տեղաշարժվելու, ռիսկային իրավիճակները գնահատելու և անհրաժեշտության դեպքում աջակցություն ստանալու հնարավորությունների մասին։

Եռօրյա հանդիպումը մասնակիցների համար դարձավ կարևոր հնարավորություն՝ ձեռք բերելու նոր գիտելիքներ, ստանալու իրենց հուզող հարցերի պատասխանները և ծանոթանալու այլ մարդկանց հետ, ովքեր նույնպես գտնվում են Հայաստանում՝ հարմարվելու և նոր կյանք սկսելու գործընթացում։

The post Եռօրյա հանդիպում Հայաստան նոր եկած ԼԳԲՏ+ անձանց համար appeared first on Pink Armenia.

11-րդ Ծիածան ֆորում. Համակերպո՞ւմ, թե պայքար

Մայիսի 15-16-ը տեղի ունեցավ 11-րդ Ծիածան ֆորումը:

Ֆորումը համախմբեց ԼԳԲՏ+ անձանց, համախոհներին և գործընկերներին՝ քննարկելու մարդու իրավունքների, համայնքային դիմակայունության, անվտանգության, հոգեկան առողջության և Հայաստանում ԼԳԲՏ+ մարդկանց առջև ծագած մարտահրավերների շուրջ հարցեր։

Երկօրյա հանդիպումը նպաստեց նոր կապերի ստեղծմանը, փորձի փոխանակմանն ու համայնքային համերաշխության ամրապնդմանը։

Հայաստանում ԼԳԲՏ+ անձանց մարդու իրավունքների տարեկան զեկույց

«Փինք» իրավապաշտպան հասարակական կազմակերպությունը հրապարակեց իր ամենամյա զեկույցը՝ նվիրված Հայաստանում ԼԳԲՏ+ անձանց մարդու իրավունքների վիճակին։ 2025 թվականի ընթացքում կազմակերպության սոցիալական աշխատողներն ու իրավաբանները ստացել են 402 դիմում, որոնցից առանձնացվել և մանրամասն փաստագրվել են 56 իրավախախտման դեպքեր՝ բոլորն էլ զուգորդված սեռական կողմնորոշման կամ գենդերային ինքնության հիմքով խտրականությամբ։

Տարեկան զեկույցը հանրությանը հասանելի դարձավ 11-րդ ծիածան ֆորումի ժամանակ:

Նախընտրական կեղծիքներ և ԱԲ տեսանյութեր ԼԳԲՏ համայնքի անունից. Ամփոփ Մեդիայի հրապարակումը

Ամփոփ Մեդիան հրապարակվեց հայկական քվիր միություն անվանումով կեղծ գործունեության վերաբերյալ փաստերի ստուգումը, որի միջոցով բացահայտվեցին հանրությանն ապակողմնորոշող և ԼԳԲՏ+ անձանց նկատմամբ թշնամանք սերմանող մի շարք կեղծ պնդումներ։

Նախաձեռնությունն ընդգծեց փաստահեն տեղեկատվության, մեդիագրագիտության և պատասխանատու հանրային խոսույթի կարևորությունը՝ որպես մարդու իրավունքների պաշտպանության կարևոր բաղադրիչներ։

Փինք իրավապաշտպան ՀԿ-ն օգտագործվում է ապատեղեկատվական և մանիպուլյատիվ արշավների շրջանակում

Fip.am փաստերի ստուգման հարթակի ուսումնասիրության համաձայն՝ սոցիալական ցանցերում տարածվել են կեղծ էջեր, կեղծ նամակներ և չհաստատված տեղեկություններ՝ հասարակության մեջ վախ, խուճապ և բևեռացում առաջացնելու նպատակով։

Հոդվածը եզրակացնում է, որ ԼԳԲՏ թեման հաճախ վերածվում է քաղաքական ազդեցության ու հակաքարոզչության գործիքի, իսկ իրավապաշտպան կազմակերպությունները դառնում են թիրախավորված տեղեկատվական հարձակումների զոհ։

Պահանջներ քաղաքական կուսակցություններին՝ խորհրդարանական ընտրություններին ընդառաջ

15 հասարակական կազմակերպություններ կոչ են անում ընտրություններին մասնակցող քաղաքական ուժերին խորհրդարան անցնելու դեպքում ստանձնել հստակ պարտավորություններ կանանց իրավունքների պաշտպանության և գենդերային հավասարության ապահովման ուղղությամբ՝ առաջարկելով 15 հրատապ քայլ աշխատանքային, վերարտադրողական, սոցիալական և արդարադատության ոլորտներում։

Առաջարկները ներառում են գենդերային խտրականության ու բռնության դեմ պայքարի մեխանիզմների ուժեղացում, սեռական կրթության ներդրում, կանանց տնտեսական և սոցիալական աջակցության ընդլայնում, ինչպես նաև բռնության ենթարկված անձանց պաշտպանության և արդարադատության հասանելիության բարելավում։

The post Լրամփոփ | մայիս 2026 appeared first on Pink Armenia.

2024 թվականի փետրվարի 3-ին  մի խումբ մարդիկ նախապես պայմանավորվել և միասին հարձակվել են մեկ անձի վրա՝ դանակով կամ այլ սուր առարկայով միջին ծանրության վնասվածք հասցնելով նրան։ Հարձակման պատճառը եղել է տուժողի նկատմամբ ատելությունը՝ կապված նրա սեռական կողմնորոշման հետ։ 

Սույն գործը կազմակերպության կողմից տասնյակ տարիներ շարունակ արձանագրված նմանատիպ դեպքերից առաջինն է, որի շրջանակներում իրավապահ մարմինները հանցագործության որակման և գործի քննության ընթացքում հաշվի են առել ատելության շարժառիթը՝ այն ուղղակիորեն կապելով տուժողի սեռական կողմնորոշման հետ։ Հատկանշական է նաև, որ գործի նկատմամբ ցուցաբերված արձագանքը որոշակիորեն պայմանավորված է եղել այն հանգամանքով, որ տուժողը հանդիսացել է ԱՄՆ քաղաքացի։ 

Քրեական վարույթի ընթացքում քննչական մարմինը մեղադրանքի հիմքում դրել է այն փաստը, որ հանցագործությունը կատարվել է նույնասեռական անձի նկատմամբ անհանդուրժողականության և ատելության շարժառիթով։ Դատախազը հաստատել է մեղադրական եզրակացությունը, և գործն ուղարկվել է Երևան քաղաքի առաջին ատյանի ընդհանուր իրավասության քրեական դատարան։ 

Դատարանը, հետազոտելով և գնահատելով ներկայացված ապացույցները, հաստատված է համարել մեղադրանքը (ՀՀ քրեական օրենսգրքի 167-րդ հոդվածի 2-րդ մասի 7-րդ և 15-րդ կետերով) և կայացրել է մեղադրական վերդիկտ։

2026 թվականի ապրիլի 23-ին դատարանը մեղադրյալներին ճանաչել է մեղավոր և դատապարտել 2 տարի 6 ամիս ժամկետով ազատազրկման։ 

Միաժամանակ, անհրաժեշտ է ընդգծել, որ այս գործը մնում է նախադեպ այն պայմաններում, երբ ԼԳԲՏ+ անձանց նկատմամբ բռնության և ատելության հիմքով կատարված տասնյակ այլ դեպքեր պատշաճ քննության չեն ենթարկվում, իսկ ատելության շարժառիթը հաճախ անտեսվում է իրավապահ մարմինների կողմից։ ԼԳԲՏ+ անձանց շրջանում իրավապահ համակարգի նկատմամբ անվստահությունը շարունակում է մնալ լուրջ և մտահոգիչ խնդիր, ինչը պայմանավորված է ինչպես անարդյունավետ քննություններով, այնպես էլ երկար տարիներ ձևավորված անպատժելիության խորապես արմատավորված մթնոլորտով։ 

The post ԼԳԲՏ+ անձանց նկատմամբ ատելությունը՝ որպես ծանրացնող հանգամանք․ Նախադեպային որոշում appeared first on Pink Armenia.

Մայիսի 15-16-ը տեղի ունեցավ 11-րդ Ծիածան ֆորումը, որը համախմբեց ԼԳԲՏ+ անձանց, համախոհներին ու գործընկեր կազմակերպություններին՝ քննարկման, փոխադարձ աջակցության և համայնքային կապերի ամրապնդման շուրջ։

Այս տարվա ֆորումն անցկացվեց «Համակերպո՞ւմ, թե պայքար» խորագրի ներքո՝ ստեղծելով տարածք խոսելու Հայաստանում ԼԳԲՏ+ անձանց առջև կանգնած մարտահրավերների, ճնշումներին արձագանքելու տարբեր ռազմավարությունների, ինչպես նաև համատեղ պայքարի, խնամքի և համագործակցության կարևորության մասին։

Ֆորումը մեկնարկեց «ԼԳԲՏ+ անձանց մարդու իրավունքների վիճակը Հայաստանում․ 2025թ․» տարեկան զեկույցի ներկայացմամբ և կլոր-սեղան քննարկմամբ։ Մասնակիցները քննարկեցին սեռական կողմնորոշման և գենդերային ինքնության հիմքով 2025 թվականին արձանագրված մարդու իրավունքների խախտումները, իրավապահ մարմիններին դիմելու խոչընդոտները, ինստիտուտների նկատմամբ անվստահությունը, ատելության հիմքով հանցագործությունները, ատելության խոսքը և բռնության կոչերը, ընտանեկան և զուգընկերային բռնության դեպքերը, ինչպես նաև արդարադատության ոլորտում առկա խնդիրները։

«ԼԳԲՏ+ անձանց մարդու իրավունքների իրավիճակը Հայաստանում․ 2025թ․» զեկույցը ներկայացնում է Հայաստանում ԼԳԲՏ+ անձանց մարդու իրավունքների իրավիճակը՝ անդրադառնալով խտրականության, բռնության և ատելության խոսքի դեպքերին։

Ֆորումի պաշտոնական բացման ընթացքում մասնակիցներին ներկայացվեցին նաև ֆորումի տարածքներն ու անվտանգության կանոնները՝ ընդգծելով Հայաստանում ԼԳԲՏ+ անձանց և համախորհների համար ավելի անվտանգ և ներառական միջավայրերի ստեղծման կարևորությունը։

«Հայաստանում մեր հեռանկարը․ գործընկերների հետ մտահոգությունների քննարկում»

Առաջին օրվա կարևոր քննարկումներից մեկը՝ «Հայաստանում մեր հեռանկարը․ գործընկերների հետ մտահոգությունների քննարկում»-ը, համախմբեց ԼԳԲՏ+ և գործընկեր կազմակերպությունների ներկայացուցիչներին՝ անդրադառնալու ներկայիս քաղաքական միջավայրի մարտահրավերներին, շարժման և մարդու իրավունքների օրակարգի զարգացման տեսլականներին և շարժման ներսում ավելի ամուր համագործակցության հնարավորություններին։

Ֆորումի ընթացքում կազմակերպվեցին նաև «Շունչ քաշելու տարածքներ»՝ նվիրված մասնակիցների հուզական բարեկեցությանը և վերալիցքավորմանը։

Դրանք ներառում էին կարաոկե, պարեր, հանգստի և ինքնախնամքի տարբեր գործիքներ՝ ստեղծելով աջակցող և ապահով միջավայր։

Առաջին օրվա զուգահեռ քննարկումները նվիրված էին ընտրական գործընթացների և քաղաքական հռետորաբանության ազդեցությանը ԼԳԲՏ+ համայնքի վրա, անվտանգ և ներառական համայնքային տարածքների պատմությանն ու կարևորությանը, ինչպես նաև սոցիալական մեդիայի, ալգորիթմների և ապատեղեկատվության ազդեցությանը վստահության և հաղորդակցության վրա։

Օրվա ավարտին տեղի ունեցավ հյուրասիրություն և երաժշտական երեկո, որը դարձավ ոչ ֆորմալ ու ապահով տարածք շփումների, նոր ծանոթությունների, համայնքային կապերի ամրապնդման և համերաշխությունը տոնելու համար։

Ֆորումի երկրորդ օրը շարունակվեց համայնքի ներսում առկա այլատյացության, նախապաշարմունքների և բացառման շուրջ քննարկումներով՝ փորձելով հասկանալ համակարգային ճնշումների ազդեցությունը և խոսել ավելի ներառական ու համերաշխ միջավայրեր կառուցելու հնարավորությունների մասին։

Մասնակիցները ներգրավվեցին նաև քվիր քաղաքականության և ֆեմինիզմի վերաբերյալ քննարկումներում։

Ֆորումի շրջանակում կազմակերպվեցին նաև զուգահեռ տարածքներ՝ նվիրված երիտասարդական փոխանակման ծրագրերին, հայկական դրեգ մշակույթին՝ որպես տեսանելիության և դիմադրության ձևի, ինչպես նաև միգրանտների և ապաստան հայցողների առջև կանգնած իրավական և սոցիալական խնդիրներին։ Մյուս տարածքը ԼԳԲՏ+ անձանց ծնողների հետ քննարկումն էր, որը հնարավորություն էր ստեղծել ջերմ միջավայրում խոսել ընտանիքի անդամների աջակցության և ծնողների հետ հարաբերությունների կարևորության մասին:

Ֆորումի երկրորդ օրվա ընթացքում մասնակիցների համար հասանելի էր նաև ՄԻԱՎ-ի անվճար և գաղտնի թեստավորման ու խորհրդատվության տարածք՝ «Իրական աշխարհ, իրական մարդիկ» ՀԿ-ի հետ համագործակցությամբ։

11-րդ Ծիածան ֆորումն այս տարի համախմբեց ընդհանուր առմամբ 158 մասնակցի՝ ԼԳԲՏ+ անձանց, համախոհների, ծնողների, օգնող մասնագետների, հետազոտողների, միջազգային և պետական մարմինների ներկայացուցիչների և այլ անձանց:

11-րդ Ծիածան ֆորումն ավարտվեց ամփոփիչ քննարկմամբ, որի ընթացքում անդրադարձ կատարվեց երկու օրերի հիմնական թեմաներին, մարտահրավերներին և ձևավորված կարևոր եզրահանգումներին։

Ինչպես նախորդ տարիներին, այս տարի ևս Ծիածան ֆորումը դարձավ կարևոր հարթակ՝ Հայաստանում ԼԳԲՏ+ համայնքի և համախոհ շարժումների միջև երկխոսության, տեսանելիության, համերաշխության և համագործակցության ամրապնդման համար։

The post Համակերպո՞ւմ, թե պայքար. 11-րդ Ծիածան ֆորում appeared first on Pink Armenia.

«Փինք» իրավապաշտպան հասարակական կազմակերպությունը հրապարակեց իր ամենամյա զեկույցը՝ նվիրված Հայաստանում ԼԳԲՏ+ անձանց մարդու իրավունքների վիճակին։ 2025 թվականի ընթացքում կազմակերպության սոցիալական աշխատողներն ու իրավաբանները ստացել են 402 դիմում, որոնցից առանձնացվել և մանրամասն փաստագրվել են 56 իրավախախտման դեպքեր՝ բոլորն էլ զուգորդված սեռական կողմնորոշման կամ գենդերային ինքնության հիմքով խտրականությամբ։

Ընտանեկան բռնությունը շարունակում է գերակշռել

Արձանագրված 56 դեպքերից 30-ը ընտանեկան բռնության դեպքեր են։ Դրանցից 20-ը կատարվել են չափահաս անձանց, հիմնականում՝ ծնողների կողմից, հինգը՝ անչափահասների նկատմամբ, ևս հինգը՝ զուգընկերային բռնության դեպքեր են։ Տուժածները ենթարկվել են հոգեբանական, ֆիզիկական և տնտեսական բռնության, ընդհուպ տնից վտարման ու ազատ տեղաշարժի սահմանափակման։ Մի շարք դեպքերում ընտանիքի անդամները փորձել են «ուղղել» անձի սեռական կողմնորոշումը կամ գենդերային ինքնությունը՝ դիմելով հոգեբանական ճնշման, գուշակների կամ ոչ մասնագիտական այլ մեթոդների, ինչը կարող է որակվել որպես անմարդկային վերաբերմունք։

Փաստագրված այլ խախտումներից են ֆիզիկական բռնության 7, սեռական ոտնձգության 2, շորթման 1, հոգեբանական բռնության և սպառնալիքների բազմաթիվ դեպքերը, ինչպես նաև աշխատանքային իրավունքների խախտման երեք դեպք, որոնցում տուժածները մերժվել են աշխատանքի կամ ազատվել են բացառապես իրենց ինքնության պատճառով։

Ոստիկանությանը դիմում են քչերը

Զեկույցի մտահոգիչ եզրակացություններից մեկն այն է, որ 56 դեպքերից միայն 8-ի պարագայում են տուժածներն իրավապահ մարմիններին դիմել։ Սա ամենացածր ցուցանիշն է վերջին տարիների ընթացքում։ Կազմակերպությունը նշում է, որ իրավապահ համակարգի նկատմամբ անվստահությունը պայմանավորված է երեք հիմնական գործոնով՝ ոստիկանության կողմից խտրական վերաբերմունքի և ծաղրի շարունակական դեպքերը, գործերի անարդյունավետ քննությունը և հետագա բռնության կանխարգելման որևէ մեխանիզմի բացակայությունը։

Փաստագրված է դեպք, երբ տրանս կնոջ ծեծի ենթարկած տղամարդը ոստիկանական բաժնում, քննիչի ներկայությամբ, շարունակել է հնչեցնել խտրական վիրավորանքներ։ Մեկ այլ դեպքում թմրանյութերի կասկածանքով բերման ենթարկված անձից պահանջել են բացել իր սոցիալական ցանցի էջերը, որից հետո ոստիկաններն իմացել են նրա սեռական կողմնորոշման մասին և սկսել են վիրավորական արտահայտություններ անել։

Ատելության խոսքը՝ նաև պաշտոնյաների բերանից

2025 թվականի մարտին Գյումրու քաղաքապետի թեկնածու Վարդան Ղուկասյանը մամուլի ասուլիսի ընթացքում հայտարարեց, որ պատրաստ է «եկեղեցու մեջ գնդակահարել» այն քահանային, ով հանկարծ նույնասեռականների ամուսնություն կպսակի, և կոչ արեց աջակցել իրեն՝ «տեսնեք, թե ես ինչ կբերեմ ԼԳՏՊ-ի գլխին» խոստումով։ Չնայած երեք իրավապաշտպան կազմակերպությունների կողմից ներկայացված հաղորդումներին՝ քննչական մարմինը արձանագրեց, որ խոսքը բռնության կոչ կամ քարոզ չի պարունակում։ Ղուկասյանը հետագայում ընտրվեց որպես քաղաքապետ և շարունակել է իր խտրական արտահայտությունները՝ առանց պետական մարմինների որևէ արձագանքի։

Միջազգային վճիռներ և շարունակվող պայքար

2025 թվականի հունվարին Մարդու իրավունքների եվրոպական դատարանը «Մինասյանը և այլոք ընդդեմ Հայաստանի» գործով արձանագրեց, որ Հայաստանը խախտել է 14 դիմողների մասնավոր կյանքի և խտրականությունից զերծ լինելու իրավունքները՝ չապահովելով նրանց արդյունավետ պաշտպանություն 2014 թվականին «Իրավունք» թերթի կողմից հրապարակած «ազգի թշնամիների սև ցուցակից»։ Վճիռը պարտավորեցնում է պետությանը ձեռնարկել կոնկրետ քայլեր ատելության խոսքից պաշտպանության մեխանիզմներ ստեղծելու ուղղությամբ։

ՄԱԿ-ի Համընդհանուր պարբերական դիտարկման չորրորդ շրջափուլում Հայաստանին ուղղված ԼԳԲՏ+ անձանց իրավունքներին վերաբերող առաջարկները հասել են 24-ի՝ ներկայացված 22 պետությունների կողմից։ Սակայն հակախտրականության օրենքի նախագիծը, որի շուրջ քննարկումները տևում են ավելի քան մեկ տասնամյակ, դեռևս չի հասել Ազգային ժողով և շարունակում է չներառել սեռական կողմնորոշումը և գենդերային ինքնությունը՝ որպես պաշտպանված հատկանիշներ։

Առաջարկները

«Փինք» ՀԿ-ն կոչ է անում պետական մարմիններին ընդունել խտրականության դեմ համապարփակ օրենք, պատշաճ կիրառել ատելության շարժառիթը՝ որպես ծանրացուցիչ հանգամանք, պարտադիր վերապատրաստել իրավապահներին, և, որ կարևոր է, ձեռնպահ մնալ քաղաքական մրցակցության շրջանակում ԼԳԲՏ+ թեմայի շահարկումից։ Լրատվամիջոցներին կազմակերպությունը կոչ է անում խուսափել ատելություն սերմանող հրապարակումներից, իսկ միջազգային կառույցներին՝ ուժեղացնել Հայաստանի ստանձնած պարտավորությունների կատարման մշտադիտարկումը։

Ամբողջական զեկույցը և բոլոր առաջարկությունները կարող եք կարդալ այստեղ։

The post ԼԳԲՏ+ անձանց իրավունքների վիճակը Հայաստանում մնում է մտահոգիչ. տարեկան զեկույց appeared first on Pink Armenia.

Մինչ Իսպանիան առաջին անգամ զբաղեցնում է Եվրոպայի ԼԳԲՏԻ իրավունքների վարկանիշի առաջին հորիզոնականը, և տասնյակ երկրներ արձանագրում են տեղաշարժեր երկու ուղղություններով, Հայաստանը մնացել է անշարժ։ Տարեցտարի երկիրը մնում է նույն դիրքում՝ ԼԳԲՏԻ համայնքն ապրում է առանց իրավական պաշտպանության, առանց ճանաչման և առանց արդյունավետ իրավական միջոցների։

Ամեն տարի Իլգա Եվրոպան հրապարակում է իր Ծիածան քարտեզը՝ Եվրոպայի 49 երկրների վարկանիշը՝ ըստ ԼԳԲՏԻ մարդկանց համար գործող իրավական և քաղաքականության շրջանակների, որոնք գնահատվում են 0-ից 100 տոկոս սանդղակով։ 2026 թվականի հրատարակությունը, որը հրապարակվել է այսօր, ներկայացնում է երկու պատմություն միաժամանակ․ մեկը՝ քաղաքական խիզախության, մյուսը՝ իրական ու աճող վտանգի։ Հայաստանի համար այն տեղաշարժ չի գրանցում։ Այն ներկայացնում է լճացման պատմություն։

2026 թվականի քարտեզի գագաթին Իսպանիան կոտրում է Մալթայի՝ տասնամյա տեւողությամբ առաջին տեղի պահպանումը՝ իր դիրքը նվաճելով կոնկրետ կառավարական գործողություններով. ԼԳԲՏԻ և տրանս իրավունքների վերաբերյալ իրավահավասարության գործողությունների ծրագրերի ընդունմամբ, Հավասարության անկախ մարմնի ստեղծմամբ, ինչպես նաև առողջապահական համակարգում տրանս մարդկանց դեպատոլոգիայի լիարժեք իրականացմամբ։ Մալթան իջել է երկրորդ տեղ՝ 88 տոկոս միավորով, ինչը արտացոլում է իր իսկ լճացումը և համապարփակ հակախտրականության շրջանակի բացակայությունը՝ չնայած 2019 թվականին ներկայացված Իրավահավասարության օրինագծին, որը այդ ժամանակից ի վեր կանգ է առել։ Իսլանդիան երրորդ տեղում է՝ 86 տոկոս միավորով։

Սանդղակի մյուս ծայրում երեք ամենացածր վարկանիշ ունեցող երկրներն են՝ Ռուսաստանը և Ադրբեջանը՝ երկուսն էլ 2 տոկոսով, և Թուրքիան՝ 5 տոկոսով։ Եվրոպական միության շրջանակում ամենացածր վարկանիշ ունեցող անդամ երկրներն են՝ Ռումինիան՝ 19 տոկոսով, Բուլղարիան՝ 20 տոկոսով, և Լեհաստանը՝ 22 տոկոսով։

«Այս տարվա Ծիածան քարտեզը պատմում է երկու պատմություն միաժամանակ։ Մեկը՝ իսկական խիզախության, որը դրսևորվում է Իսպանիայում, դատարաններում և այն ղեկավարների մոտ, ովքեր ընտրում են կանգնել իրենց համայնքների կողքին՝ նրանց մեղադրելու փոխարեն։ Իսկ մյուսը՝ իրական ու աճող վտանգի, որը չի կարելի աչքաթող անել»։

Քաթրին Հուգենդուբել, Իլգա Եվրոպայի փոխտնօրեն։

Հայաստանի միավորը Ծիածան քարտեզում չի փոխվել։ Չկա որևէ նոր օրենք, չկա որևէ նոր քաղաքականություն, չկա էական առաջընթաց, սակայն չկա նաև կտրուկ հետընթաց։ Երկիրը մնում է այնտեղ, որտեղ եղել է տարիներ շարունակ՝ եվրոպական վարկանիշի ստորին մասում, շրջապատված իրավական դատարկությամբ, որը ԼԳԲՏԻ մարդկանց թողնում է պետության կողմից ամբողջովին անպաշտպան։

Հակախտրականության մասին օրենքի նախագիծը, որին քաղաքացիական հասարակությունը հետևում է արդեն մի քանի տարի, դեռևս չի վերջնականացվել։ Կարևոր է նշել, որ այն հստակորեն չի ներառում սեռական կողմնորոշումը և գենդերային ինքնությունը խտրականության արգելված հիմքերի շարքում։ Թեև ակնկալվում էր, որ օրենքը կհասնի Ազգային ժողով 2025 թվականի սկզբին, դա տեղի չունեցավ։ Հայաստանի կառավարությունը նաև հաստատեց 2025-2028 թվականների Գենդերային քաղաքականության ռազմավարությունն ու գործողությունների ծրագիրը, որն իրավապաշտպան կազմակերպությունները ողջունեցին, սակայն նշեցին, որ այն ևս չի անդրադառնում սեռական կողմնորոշմանն ու գենդերային ինքնությանը՝ որպես պաշտպանված հիմքերի։

Այս օրենսդրական լռության մարդկային գինը հայկական քաղաքացիական հասարակության կողմից փաստագրվում է մտահոգիչ մանրամասնությամբ։ «Փինք» ՀԿ-ն միայն 2025 թվականին գրանցել է 56 իրավախախտում՝ կապված սեռական կողմնորոշման կամ գենդերային ինքնության հիման վրա խտրականության հետ։ Այդ դեպքերից 30-ը վերաբերում էին ընտանեկան բռնությանը։ Բոլոր 56 դեպքերից միայն 8-ը հաղորդվեցին ոստիկանությանը։ Այդ 8-ից մեկ տուժած հետ վերցրեց իր բողոքը, ևս մեկը հրաժարվեց վարույթը շարունակել, և միայն մեկ գործ ի վերջո հասավ դատարան։

Տրանս մարդկանց իրավիճակն առանձնապես ծանր է։ Հայաստանում չկա գենդերի նշման փոփոխման իրավական ընթացակարգ՝ պաշտոնական փաստաթղթերում։ Թեև անվան փոփոխությունը տեխնիկապես հնարավոր է Քաղաքացիական կացության ակտերի գրանցման մասին օրենքով, օրենքը չի նախատեսում գենդերի իրավական ճանաչման որևէ ուղի։ Գործնականում, տրանս մարդիկ հաճախ պարտավորվում են անցնել հոգեբուժական գնահատում կամ բժշկական միջամտություններ՝ մուտք ստանալու այն իրավունքներին, որոնք միջազգային չափանիշներով պետք է հիմնված լինեն ինքնորոշման սկզբունքի վրա։

Որևէ պաշտոնական շրջանակի բացակայության պայմաններում Հայաստանում տրանս մարդիկ ստիպված են ապավինել ոչ պաշտոնական ցանցերին և բուժաշխատողների հետ անձնական կապերին։ Երկրում զգալիորեն պակասում են էնդոկրինոլոգները և այլ մասնագետները, որոնք պատրաստված են մատուցելու գենդերի վերահաստատման բուժօգնություն։ Ինչպես փաստագրել է Փինքը, սա անհատներին թողնում է կա՛մ ինքնուրույն բուժում ստանալու, կա՛մ չվերապատրաստված մասնագետներից կախված լինելու վիճակում՝ ստեղծելով լուրջ առողջական ռիսկեր։

Բանակում 2025 թվականին փաստագրված իրավախախտումները ներառում են սեռական կողմնորոշման հարկադիր բացահայտում, նվաստացում և գեյ զինվորների հարկադիր տեղափոխություններ։ Մի դեպքում, երիտասարդ տղամարդը մի քանի ամսով տեղավորվեց հոգեբուժարանում՝ միայն իր սեռական կողմնորոշման պատճառով։ Մեկ այլ դեպքում, ինտիմ բնույթի տեսանյութեր տարածվեցին զինծառայողների շրջանում առանց համաձայնության՝ հանգեցնելով սպառնալիքների և հետապնդումների, որոնք շարունակվեցին նույնիսկ անձի՝ զորացրվելուց հետո։

Մարդու իրավունքների եվրոպական դատարանի 2025 թվականի հունվարին կայացված վճիռը խախտումներ ճանաչեց Հայաստանի դեմ «Մինասյան և այլք ընդդեմ Հայաստանի» գործով, որը հարուցել էին 14 ակտիվիստներ, որոնք թիրախավորվել էին ԼԳԲՏԻ-ֆոբ ատելության խոսքով՝ 2014 թվականին Եվրատեսիլ երգի մրցույթում մասնակցի հանդեպ իրենց հանրային աջակցությունից հետո։ Դատարանը գտավ, որ Հայաստանի ներպետական դատարանները չկարողացան արդարացի հավասարակշռություն հաստատել արտահայտվելու ազատության և մասնավոր կյանքի իրավունքի միջև՝ չապահովելով արդյունավետ պաշտպանություն ատելության խոսքից։ Առանձին հետազոտությամբ Փինքը պարզել է, որ բռնության կոչեր քրեականացնող քրեական օրենսգրքի գործող դրույթը կիրառվել է գրեթե բացառապես քաղաքական իշխանություններին վերաբերող դեպքերում և երբեք էապես չի օգտագործվել ԼԳԲՏԻ մարդկանց պաշտպանելու համար։

Հայաստանի պատկերի մի հարթություն պարունակում է գոնե ապագա տեղաշարժի հնարավորություն։ 2025 թվականի նոյեմբերին Եվրոպական հանձնաժողովը հայկական իշխանություններին ներկայացրեց Վիզայի ազատականացման գործողությունների ծրագիր, որը սահմանում է անհրաժեշտ բարեփոխումներ՝ ներառյալ Հայաստանի Մարդու իրավունքների ազգային ռազմավարության արդյունավետ իրականացումը և հակախտրականության քաղաքականության ուժեղացումը։ Դեկտեմբերին տեղի ունեցավ ԵՄ-Հայաստան Գործընկերության խորհրդի վեցերորդ նիստը, որտեղ երկու կողմերն ընդունեցին նոր Ռազմավարական օրակարգ և նշեցին 2026 թվականի մայիսին նախատեսված ԵՄ-Հայաստան գագաթնաժողովը։ Քանի որ ԵՄ-Հայաստան համագործակցությունը հստակորեն հիմնված է մարդու իրավունքների և չխտրականության պարտավորությունների վրա, խորացված գործընկերությունը կարող է ի վերջո հետևանքներ ունենալ ԼԳԲՏԻ պաշտպանվածության համար, թեև Ծիածան քարտեզի տվյալները դեռևս չեն ցույց տալիս այդ ազդեցության որևէ նշան։

The post Անշարժ կանգնած` մինչդեռ Եվրոպան առաջ է շարժվում appeared first on Pink Armenia.

Թվային ճամփաներ. Փինքի ներկայությունը սոցիալական ցանցերում

Փինքը մշտապես ակտիվ է Հայաստանում օգտագործվող տարբեր սոցիալական ցանցերում և հարթակներում։ Գործունեության առաջին տարիներից ամենաշատ կիրառվող հարթակը Ֆեյսբուքն էր, ապա առաջ եկան նոր հնարավորություններ՝ նոր ձևաչափերով։ Սակայն տարիների ընթացքում յուրաքանչյուր հարթակ փոխում է իր աշխատանքային պայմանները, որոշները չեն դիմանում կիբեռաշխարհի մրցապայքարին և փակվում կամ վերափոխվում են։ Օրինակ՝ Թվիթերը միկրոբլոգը վաճառվելուց հետո, նոր սեփականատիրոջ կողմից ատելության ու բռնության խրախուսման պատճառով, Փինքը որոշեց այլևս չօգտագործել արդեն Իքս վերանվանված հարթակը և կազմակերպության էջը պահել որպես արխիվ։ Փոխարենը սկսեցինք ակտիվ օգտագործել Թրեդսը և ԲլյուՍքայը։

Երկար ժամանակ մենք քննարկում էինք նաև ՏիկՏոկը՝ որպես հնարավորություն։ Կազմակերպության ներսում դիմադրությունն ու թերահավատությունը քիչ չէր, բայց սերնդափոխությունը՝ ինչպես կազմակերպությունում, այնպես էլ համայնքում, մեզ դրդեց այդ ռիսկին դիմել։ ՏիկՏոկը մի կողմից հեղեղված է ծայրահեղ ատելությամբ, մյուս կողմից այնտեղ ներկա են ԼԳԲՏ+ բազմաթիվ ազդեցիկ մարդիկ և համախոհներ, որոնք բացահայտ խոսում են սեռականության մասին, բարձրացնում են համայնքի տեսանելությունը, հավաքում հարյուր հազարավոր դիտումներ և արթնացնում հետաքրքրություն թեմայի շուրջ։

Այսպիսով, մենք ևս կամաց-կամաց մուտք ենք գործում այդ հարթակ՝ սկզբնապես Հայաստանում գալիք խորհրդարանական ընտրություններին ընդառաջ համայնքի ակտիվությունը խրախուսող տեսանյութերով։ Հետևե՛ք մեզ սոցիալական ցանցերում։

Բարօրության եռօրյա ճամբար

Ապրիլի 10-12-ը տեղի ունեցավ արդեն ավանդական դարձած անձնային աճին նվիրված ճամբարը։ Այս եռօրյա հանդիպումը միավորել էր քվիր անձանց և համախոհների, ստեղծելով անվտանգ, աջակցող և հոգատար միջավայր՝ անձնային աճի և փորձի փոխանակման համար։

Այս անգամ ճամբարի առանցքային թեման անվտանգությունն էր՝ իր բազմաշերտ դրսևորումներով։

Երեք օրերի ընթացքում մասնակիցները հնարավորություն ունեցան աշխատել մասնագիտացված հոգեբանների և կիբերանվտանգության մասնագետների հետ: Միասին ուսումնասիրեցինք թվային, հուզական, հոգեբանական և ֆիզիկական անվտանգության տարբեր կողմերը։

Խտրականության դեմ օրենքը քննարկվել է ԵԽ մարդու իրավունքների հանձնակատարի և Նիկոլ Փաշինյանի նամակագրությունում

2026 թ․-ի մարտի 30-ին Եվրոպայի խորհրդի Մարդու իրավունքների հանձնակատարը, որպես իր` սույն թվականի փետրվարին Հայաստան կատարած աշխատանքային այցի ամփոփում, նամակով դիմել է Նիկոլ Փաշինյանին` կոչ անելով ընդունել խտրականության դեմ համապարփակ պաշտպանություն նախատեսող օրենսդրություն։

Ընդգծելով Հայաստանի կողմից խտրականության դեմ օրենսդրության` ԵԽ չափանիշներին համապատասխանեցման գործընթացի կարևորությունը` Հանձնակատարը անդրադարձել է այն հանգամանքին, որ ՀՀ Արդարադատության նախարարության կողմից մշակված խտրականության դեմ օրենքի նախագիծը որպես հավասարության մարմին է նախատեսում Մարդու իրավունքների պաշտպանին։ Ինչը, սակայն, կարող է խնդրահարույց լինել՝ հաշվի առնելով միջազգային պահանջներն այն մասին, որ Հավասարության մարմինը պետք է անհատական աջակցություն ցուցաբերի խտրականությունից տուժած անձանց, ներկայացնի նրանց շահերը տարբեր մարմինների առաջ՝ ներառյալ մասնավոր կառույցների կողմից դրսևորված խտրականության դեպքերում։ 

Հանձնակատարը նաև անդրադարձել է ԼԳԲՏԻ անձանց պաշտպանության անհրաժեշտությանը` շեշտելով սեռական կողմնորոշումը և գենդերային ինքնությունը ուղղակիորեն որպես պաշտպանված հատկանիշ օրենքում ներառելու անհրաժեշտությունը` որպես խտրականությունից պաշտպանության հիմք։ Անդրադարձ է կատարվել նաև շահագրգիռ կազմակերպությունների կողմից հանրային շահի պաշտպանության նպատակով դատարան դիմելու իրավունքի նախատեսման կարևորությանը։ 

Կեղծ էջերի մասին կարևոր զգուշացում

Վերջին շրջանում արձանագրում ենք Փինքի անվան տակ հանդես եկող կեղծ էջերի ակտիվացում, որոնք նպատակային կերպով տարածում են ապատեղեկատվություն կազմակերպության գործունեության վերաբերյալ։ 

Այսպիսի միջադեպերը պատահական չեն․ դրանք հաճախ համընկնում են նախընտրական ժամանակահատվածների հետ, երբ հանրային դիսկուրսը դառնում է առավել բևեռացված, իսկ ԼԳԲՏ+ անձինք՝ առավել խոցելի թիրախ մանիպուլյատիվ գործողությունների և ապատեղեկատվության տարածման համար։ Նման փուլերում ապատեղեկատվական տարբեր արշավները օգտագործվում են որպես գործիք՝ հանրային կարծիքը ձևավորելու, վախ ու անվստահություն սերմանելու նպատակով։

Այս դեպքը ևս մեկ անգամ ցույց է տալիս, որ ԼԳԲՏ+ անձիք և հիմնահարցերը շարունակաբար շահարկվում են քաղաքական և տեղեկատվական մանիպուլյացիաների շրջանակում՝ նպատակ ունենալով խորացնել հասարակական լարվածությունը և խթանել ատելության խոսքը։

Ակադեմիական գրագրության (Academic writing) դասընթաց

Փինքը հրավիրում է մասնակցելու «Ակադեմիական գրագրություն․ վերլուծական էսսե, տեսություն և հրապարակման ուղիներ» առցանց դասընթացին։ Դասախոսը Հարվարդի համալսարանի մասնագետ` Նազելի Տոնոյանն է։

Այս դասընթացը նախատեսված է բոլոր նրանց համար, ովքեր ցանկանում են զարգացնել իրենց ակադեմիական/մասնագիտական գրագրության հմտությունները անգլերենով և սովորել գրել մագիստրոսական մակարդակի վերլուծական էսսե։ 

Գրանցումը բաց է մինչև մայիսի 31-ը։

The post Լրամփոփ | ապրիլ 2026 appeared first on Pink Armenia.

Վերջին շրջանում արձանագրում ենք Փինքի անվան տակ հանդես եկող կեղծ էջերի ակտիվացում, որոնք նպատակային կերպով տարածում են ապատեղեկատվություն կազմակերպության գործունեության վերաբերյալ։ 

Այսպիսի միջադեպերը պատահական չեն․ դրանք հաճախ համընկնում են նախընտրական ժամանակահատվածների հետ, երբ հանրային դիսկուրսը դառնում է առավել բևեռացված, իսկ ԼԳԲՏ+ անձինք՝ առավել խոցելի թիրախ մանիպուլյատիվ գործողությունների և ապատեղեկատվության տարածման համար։ Նման փուլերում ապատեղեկատվական տարբեր արշավները օգտագործվում են որպես գործիք՝ հանրային կարծիքը ձևավորելու, վախ ու անվստահություն սերմանելու նպատակով։ 

Վերջին արձանագրված դեպքերից մեկում ստեղծվել էր կեղծ X (նախկին Twitter) հարթակում գործող հաշիվ՝ վավերացված նշանի իմիտացիայով, որը ներկայանում էր որպես Փինքի պաշտոնական էջ։

Այս մեթոդը կիրառվում է վստահություն ձևավորելու և օգտատերերին մոլորեցնելու համար։ Նման կեղծ հաշիվների միջոցով փորձ է արվում ներգրավել ԼԳԲՏ+ անձանց կասկածելի նախաձեռնությունների մեջ, այդ թվում՝ հանդիպումների կամ հավաքների, ինչը կարող է լուրջ վտանգներ ստեղծել նրանց անվտանգության և բարեկեցության համար։ 

Այս դեպքը ևս մեկ անգամ ցույց է տալիս, որ ԼԳԲՏ+ անձիք և հիմնահարցերը  շարունակաբար շահարկվում են քաղաքական և տեղեկատվական մանիպուլյացիաների շրջանակում՝ նպատակ ունենալով խորացնել հասարակական լարվածությունը և խթանել ատելության խոսքը։ 

Նշված կեղծ հաշիվը արդեն կասեցվել է, սակայն նման փորձերը կարող են կրկնվել, ուստի կարևոր է պահպանել զգոնություն և տեղեկատվական հիգիենա։ 

Հիշեցնում ենք, որ Փինքի պաշտոնական օգտանունը բոլոր ակտիվ հարթակներում @pinkarmenia է՝ առանց հավելյալ նշանների։ Միաժամանակ տեղեկացնում ենք, որ X (Twitter) հարթակում մեր էջը ներկայումս արխիվացված է և չի գործում։ 

Խնդրում ենք հետևել միայն պաշտոնական աղբյուրներին և կասկածելի էջերի կամ նախաձեռնությունների մասին տեղեկացնել մեզ, իսկ զանգվածային լրատվության միջոցներին՝ 

• Զերծ մնալ ապատեղեկատվության տարածումից և չհրապարակել չճշտված կամ զրպարտող, վիրավորական, թշանամանք սերմանող տեղեկատվություն․ 

• Կանխարգելել ատելության խոսքի տարածումը տարբեր լրատվական հարթակներում․ 
• Համագործակցել ոլորտում մասնագիտացված կառույցների և իրավապաշտպանների հետ՝ համակողմանի տեղեկատվության ապահովման նպատակով։ 

The post Կեղծ էջերի մասին կարևոր զգուշացում appeared first on Pink Armenia.

2026թ-ի մարտի 30-ին Եվրոպայի խորհրդի Մարդու իրավունքների հանձնակատարը, որպես իր` սույն թվականի փետրվարին Հայաստան կատարած աշխատանքային այցի ամփոփում, նամակով դիմել է Նիկոլ Փաշինյանին` կոչ անելով ընդունել խտրականության դեմ համապարփակ պաշտպանություն նախատեսող օրենսդրություն։

Ընդգծելով Հայաստանի կողմից խտրականության դեմ օրենսդրության` ԵԽ չափանիշներին համապատասխանեցման գործընթացի կարևորությունը` Հանձնակատարը անդրադարձել է այն հանգամանքին, որ ՀՀ Արդարադատության նախարարության կողմից մշակված խտրականության դեմ օրենքի նախագիծը որպես հավասարության մարմին է նախատեսում Մարդու իրավունքների պաշտպանին։ Ինչը, սակայն, կարող է խնդրահարույց լինել՝ հաշվի առնելով միջազգային պահանջներն այն մասին, որ Հավասարության մարմինը պետք է անհատական աջակցություն ցուցաբերի խտրականությունից տուժած անձանց, ներկայացնի նրանց շահերը տարբեր մարմինների առաջ՝ ներառյալ մասնավոր կառույցների կողմից դրսևորված խտրականության դեպքերում։ 

Հանձնակատարը նաև անդրադարձել է ԼԳԲՏԻ անձանց պաշտպանության անհրաժեշտությանը` շեշտելով սեռական կողմնորոշումը և գենդերային ինքնությունը ուղղակիորեն որպես պաշտպանված հատկանիշ օրենքում ներառելու անհրաժեշտությունը` որպես խտրականությունից պաշտպանության հիմք։ Անդրադարձ է կատարվել նաև շահագրգիռ կազմակերպությունների կողմից հանրային շահի պաշտպանության նպատակով դատարան դիմելու իրավունքի նախատեսման կարևորությանը։ 

Մեկ այլ կարևոր շեշտադրում է այն, որ ատելության խոսքի դեմ պայքարը չի կարող սահմանափակվել միայն քրեաիրավական կարգավորմամբ։ 

Ապրիլի 6-ին ՀՀ վարչապետ Նիկոլ Փաշինյանը պատասխան նամակով անդրադարձել է Հանձնակատարի մտահոգություններին` ի թիվս այլոց նշելով հետևյալը` 

• Մարդու իրավունքների պաշտպանի լիազորությունները ներառում են նաև համապատասխան դիմումները քննող մարմնի ստեղծումը, 

• օրենքով սահմանված պաշտպանված հատկանիշների ցանկը սպառիչ չէ, հետևաբար այն կարող է ծառայել որպես բոլոր հիմքերով խտրականությունից պաշտպանության մեխանիզմ, 

•  մշակվում է նաև ատելության խոսքից պաշտպանության քաղաքացիաիրավական և վարչաիրավական միջոցների փաթեթ, 

• Հանրային պաշտպանության հայցով դատարան դիմելու իրավունքը հնարավոր է իրագործել նաև Ազգային ժողովի կողմից նախաձեռնված օրենսդրական փոփոխության միջոցով։ 

Այսպիսով, վերլուծելով վերոնշյալ նամակագրությունը, Փինք իրավապաշտպան ՀԿ-ն անհրաժեշտ է համարում կատարել հետևյալ դիտարկումները: 

Հարկ ենք համարում նշել, որ Մարդու իրավունքների պաշտպանի լիազորությունների թվարկումը ընդհանուր առմամբ չի փարատել Հանձնակատարի կողմից բարձրացված մտահոգությունները` հատկապես խտրականությունից տուժած անձանց անհատական աջակցություն ցուցաբերելու և մասնավոր մարմինների կողմից խտրականությունից պաշտպանության մասով։ 

Ինչ վերաբերում է պաշտպանված հատկանիշներին, ապա բազմիցս նշվել էր, որ ԼԳԲՏ+ անձանց նկատմամբ բարձր անհանդուրժողականության պայմաններում ոչ հստակ իրավակարգավորումները չեն կարող համարվել արդյունավետ իրավական պաշտպանության միջոց, ինչը ևս մեկ անգամ հաստատվել է հրապարակային բռնության կոչերի արգելքին վերաբերող հոդվածի կիրառման պրակտիկայում։ 

Հաշվի առնելով ատելության խոսքի կարգավորման զգայությունն ու արդեն իսկ վեց տարի շարունակ ոչ արդյունավետ կերպով գործող քրեաիրավական նորմի փորձը, գտնում ենք, որ այն ևս մեկ անգամ համակողմանի դիտարկման և գնահատման կարիք ունի` քաղհասարակության կազմակերպությունների մասնակցությամբ։ 

Ինչ վերաբերում է հանրային շահի պաշտպանության հայցով դատարան դիմելու իրավունքին, ապա դրա` խտրականության դեմ օրենքով չնախատեսելը, փաստացի, չունի որևէ հիմնավորում և կարող է գործնականում խոչընդոտ հանդիսանալ խտրականության դեպքերով այլ կարգավորման կիրառման առումով։ 

Այսպիսով, Փինք իրավապաշտպան ՀԿ-ն ևս մեկ անգամ շեշտում է, որ խտրականության դեմ օրենքի նախագիծը դեռ չի կարող համարվել խտրականությունից արդյունավետ պաշտպանության մեխանիզմ, հատկապես` ԼԳԲՏ+ անձանց համար։  

Միևնույն ժամանակ, այս խնդիրները բարձրացվել և տարիներ շարունակ և չնայած Նիկոլ Փաշինյանի այն պնդմանը, որ նախագիծը անցել է հանրային քննարկման գործընթացները, հասարական կազմակերպությունների և միջազգային կառույցների կողմից ներկայացված այս էական առաջարկները հաշվի չեն առնվել։ 

The post Խտրականության դեմ օրենքը քննարկվել է ԵԽ մարդու իրավունքների հանձնակատարի և Նիկոլ Փաշինյանի նամակագրությունում appeared first on Pink Armenia.

Ապրիլի 26-ը լեսբի անձանց տեսանելիության օրն է։

Այս օրը հիշեցում է, որ Հայաստանում շատ լեսբիներ բախվում են խտրականության, կարծրատիպերի, ընտանեկան ճնշման և բաց ապրելու վախի։

Շատ հաճախ նրանց ձայներն ու փորձառությունները անտեսվում են։
Տեսանելիության օրվա կապակցությամբ հարցազրույց տված լեսբի մասնակիցներից մեկը ասաց՝

«Հասարակությունը հաճախ չի հավատում կանանց միջև սիրուն: Տարիներով կուտակված խարանը սկսում է անցնել, երբ կա տեսանելիություն ու մարդիկ վատ չեն վերաբերվում։ Լեսբիների համար նախատեսված տարածքներն ու խնջույքները նույնպես կարևոր են, երբ քո նման մարդկանց հետ ես, քեզ տեսնում ես նրանց մեջ, ամոթ չես զգում, քեզ սեքսուալ, գրավիչ ու ազատ ես զգում»

Յուրաքանչյուր լեսբի պետք է ունենա անվտանգություն, հարգանք և ազատություն:

The post Լեսբի անձանց տեսանելիության օր appeared first on Pink Armenia.