Խոսում են ակտիվիստները․ Կուկա Կասյան

Հպարտության ամսվա առցանց արշավի մյուս մասնակիցը Կուկա Կասյանն է՝ տրանս կին, ակտիվիստ, իսկ այժմ նաև Տրանս անձանց իրավունքների պաշտպանության գլոբալ հիմնադրամի գործադիր տնօրենը։

Վաղուց է, ինչ Կուկան ներգրավվել է ակտիվիզմի մեջ։ Իր ակտիվիստ լինելը Կուկան մեկնաբանում է որպես իր ներսից եկող մի ուժ, որ ի սկզբանե առաջացել է աննկատ կերպով և ժամանակի ընթացքում զարգացել։ Կուկան պատմում է, որ երբ իր տրանս ընկերներին փողոցում վարկաբեկում կամ նեղացնում էին, ինքը նրանց համար նեցուկ էր լինում և պաշտպանում էր նրանց։ Դեռևս վաղ տարիքից նա մշտապես ցանկացել է աջակցել տրանս անձանց և փորձել է այնպես անել, որ նրանք չվախենան հասարակության ճնշումներից ու խտրականությունից։

Կուկան նշում է, որ վերջին երեք տարիների ընթացքում ավելի է ընդլայնել իր ակտիվիստական գործունեությունը։ Տրանս անձանց իրավունքների պաշտպանության գլոբալ հիմնադրամի ստեղծումը նրա ակտիվիստական գործունեության մի մասն է կազմում։ Հիմնադրամի նպատակը ոչ միայն Հայաստանի, այլև Կովկասյան տարածաշրջանի տրանս անձանց կյանքը բարելավելն է և նրանց աջակցելը, ինչպես նաև խտրականության նվազեցումը և հասարակության կարծիքի դրական փոփոխությունը տրանս անձանց նկատմամբ։

Կուկային անհանգստացնում է այն փաստը, որ Հայաստանում տրանս անձինք թե՛ սոցիալապես, թե՛ հոգեբանորեն ճնշված են, և այս առումով իր նպատակների շարքում նա նշում է տրանս անձանց ներգրավումը հասարակական կյանքում և խտրականության բացառումը նրանց հանդեպ։

Ձեռքբերումները Կուկայի ակտիվիստական գործունեության ընթացքում շատ են եղել, սակայն որպես իր ամենամեծ հաջողություն նա նշում է հիմնադրամի ստեղծումը, քանի որ իր ակտիվիստական գործունեությունը շարունակելու է հիմնադրամի միջոցով։ Հիմնադրամի ստեղծումը մեծագույն մոտիվացիա է Կուկայի համար, քանի որ առաջիկայում հիմնադրամն աջակցելու է բազմաթիվ տրանս անձանց։ Մեկ այլ մոտիվացիա է ԼԳԲՏ համայնքի ներկայացուցիչների աջակցությունը, որը նա մշտապես ստանում է, և այն, որ համայնքը գնահատում է իր ակտիվիստական գործունեությունը և հավատում իր ուժերին։

Իր ակտիվիստական գործունեության ընթացքում Կուկան բազմիցս մարտահրավերների է բախվել՝ ենթարկվելով բռնության, հետապնդումների, սոցիալական մեդիայի հարթակներում՝ վիրավորական մեկնաբանությունների։ Սակայն այդ ամենը նրան չի խանգարել, և իմանալով, որ իր ակտիվիստական գործունեությամբ նա կարող է բարելավել տրանս անձանց կյանքը, նման խնդիրները նրա համար սկսել են չնչին երևալ, և նա շարունակել և շարունակում է զբաղվել ակտիվիզմով, իսկ բացասական մեկնաբանություններին պատասխանում է բարեկիրթ կերպով՝ փորձելով կրթել հասարակությանը։

Ակտիվիզմը Կուկայի ներքին եռանդն է։ Նա ակտիվիզմի միջոցով փորձում է հասնել մի հասարակություն ստեղծելուն, որը չի լինի պառակտված, այլ ընդհակառակը՝ միասնական, և որտեղ անհանդուրժողականությունը բացառված կլինի։

Իր ակտիվիստական տեսլականում Կուկան պատկերացնում է մի հասարակություն, որտեղ չկա բռնություն և խտրականություն, և որտեղ լեսբի, գեյ, բիսեքսուալ և տրանս անձինք, լինելով հասարակության լիիրավ անդամներ, հասանելիություն կունենան հավասար իրավունքների և չեն ապրի խտրականության խարանով։