Իլգա Եվրոպայի տարեկան զեկույց․ իրավախախտումները շարունակում են անարձագանք մնալ Հայաստանում
Իլգա Եվրոպայի տարեկան զեկույցը, որը հրապարակվել է այսօր, արձանագրում է Հայաստանում ԼԳԲՏԻ անձանց վրա ազդող մարդու իրավունքների շարունակվող խնդիրները։ Նոյեմբերին Եվրոպական հանձնաժողովը ներկայացրել է վիզաների ազատականացման գործողությունների ծրագիր, որը կոչ է անում իրականացնել բարեփոխումներ մարդու իրավունքների, խտրականության դեմ պայքարի և արդարադատության մատչելիության ոլորտներում։ Միևնույն ժամանակ ապաստան հայցողները շարունակում են բախվել հարցազրույցների երկարատև ձգձգումների և ապաստարանների սահմանափակ հնարավորություններին։
Անդրադառնալով Հայաստանում իրավական վիճակին՝ զեկույցը առանձնացնում է Մինասյանը և այլոք ընդդեմ Հայաստանի գործը, որով Մարդու իրավունքների եվրոպական դատարանը արձանագրել է ԼԳԲՏԻ անձանց դեմ մեդիա հարձակումների հետ կապված խնդիրները՝ բացահայտելով ատելության խոսքի դեմ ներպետական պաշտպանական մեխանիզմների թուլությունները։ Փինք Արմենիայի մշտադիտարկման համաձայն՝ 2025 թվականին փաստագրվել է 56 խախտում, ներառյալ բռնության, խտրականության դեպքեր և գործերի քննությունների խնդիրներ։ Դատարաններն ու իրավապահ մարմինները հազվադեպ են սեռական կողմնորոշման կամ գենդերային ինքնության հիմքով կողմնակալությունը դիտարկում որպես պատասխանատվությունը ծանրացնող հանգամանք։
Քաղաքական և մեդիա հռետորաբանությունը երբեմն թիրախավորել է ԼԳԲՏԻ համայնքը, այդ թվում՝ հրապարակային սպառնալիքներ այնպիսի գործիչների կողմից, ինչպիսիք են Վարդան Ղուկասյանը (Գյումրու քաղաքապետ), առանց քրեական պատասխանատվության ենթարկելու։ Հիմնական իրավական բարեփոխումները շարունակում են մնալ չիրականացված․ Իրավահավասարության ապահովման մասին օրենքի նախագիծը հստակ չի ներառում սեռական կողմնորոշումն ու գենդերային ինքնությունը, բացակայում են իրավական սեռի ճանաչման հստակ ընթացակարգերը և տրանս անձանց համար ներառական առողջապահական ծառայությունները։ Պաշտպանական մեխանիզմները մնում են անբավարար։
Նշում ենք նաև, որ Իլգա Եվրոպայի Ծիածան քարտեզը, որը հետևում է յուրաքանչյուր երկրում օրենսդրական զարգացումներին, կթարմացվի և կներկայացվի մայիսին՝ Հոմոֆոբիայի, բիֆոբիայի և տրանսֆոբիայի դեմ միջազգային օրվա առիթով։
Այլ նորություններ
Նորությունների բաժին
